Në lartësinë e 1700 metrave mbi nivelin e detit, mes pyjeve të dendura në malin e Gurit të Zi, mes Gramshit dhe Korçës, natyra fsheh 2 liqenet akullnajore të Lukovës.
Ajri i pastër, livadhet dhe burimet e kristalta i bënë këta turiste nga Pogradeci të harronin edhe udhëtimin e orëve të gjata për të arritur deri aty.
“Është një natyrë e mrekullueshme”.
“Është një natyrë e virgjër që ja vlen të vizitohet, jo vetëm nga ne si banorë të Shqipërisë”.
“Ne vijmë çdo vit dhe jo vetëm në liqenet e bukura të Lukovës” .
Një pjesë e burimeve rrotull njihen si kurative. Prodhimet bio të zonës janë kurdoherë një kënaqësi për vizitorët.
Edhe pse ka mes tyre që rikthehen aty vit pas viti, ata thonë se pengesa kryesore ka qenë e mbetet infrastruktura.
“Problematika kryesore për të shijuar këtë natyrë është infrastruktura. Kemi pasur vështirësi të mëdha për të mbërritur, kemi bërë gati 15 kilometër për gati 2 orë e gjysëm”.
“Kjo zonë ka resurse të jashtëzakonshme. Na vjen keq që kjo është një zonë kaq e mrekullueshme dhe pak veta e njohin. Udhëtimi është njëçik i vështirë”.
Mungesa e infrastrukturës është edhe në zonat përreth, banorët e të cilëve kanë ende shpresë se bashkë me rrugët do t’ju vijnë edhe turistët. Për ta duhet të jetë prioritet i pushtetit vendor promovimi dhe zhvillimi i turizmit pasi resurset janë të shumta.