Shqipëria është renditur në vendin e 75-të nga 137 të tilla gjithsej për sa i përket konkurrueshmërisë globale, duke lënë pas vende më të zhvilluara të rajonit si Greqia, Serbia apo Mali i Zi dhe duke u renditur në të njëjtin nivel pikësh me Kroacinë.
Shqipëria renditet e dyta, pas Kroacisë në rajonin e Ballkanit Perëndimor në treguesin e Konkurrueshmërisë Globale 2017-+2018 ku analizohen tërësia e institucioneve, politikave dhe faktorëve që përcaktojnë nivelin e produktivitetit të një vendi në krahasim me klimën globale.
Kështu, vendi ka marrë një vlerësim prej 4.2 pikësh në totalin e indeksit, duke shënuar një performancë relativisht të mirë.
Shqipëria është pozicionuar në vend të 75-të, pas Kroacisë (74), duke kaluar Malin e Zi (77), Serbinë (78), Bonje Hercegovinën (103), madje ka arritur të kalojë edhe Greqinë që ndodhet në vendin e 87-të.
Indeksi i Konkurrueshmërisë Globale (GCI) përcjell performancën e 137 vendeve në 12 shtylla kryesore të konkurrueshmërisë. Ai vlerëson faktorët dhe institucionet e identifikuara nga kërkimi teorik dhe empirik si përcaktues të përmirësimeve në produktivitet dhe gjithashtu si përcaktuesi kryesor i rritjes ekonomike afatgjatë.
Raporti i Konkurrueshmërisë Globale ka një rëndësi të veçantë pasi ai ndihmon vendimmarrësit të kuptojnë natyrën komplekse dhe të shumëllojshme të sfidës së zhvillimit; të hartojnë politika më të mira të bazuara në bashkëpunimin publik-privat; dhe të ndërmarrin veprime për të rivendosur besimin në mundësitë e progresit të vazhdueshëm ekonomik.
Avantazhi i Indeksit të Konkurrueshmërisë është shumë dimensionaliteti i tij, duke mbajtur parasysh shumë faktorë që ndikojnë konkurrueshmërinë e një vendi. Raporti përmban profile të detajuara për 137 vende të përfshira në studim, renditjen globale të vendeve dhe renditjen e vendeve sipas çdo komponenti të indeksit.
Indeksi, dhe komponentët e indeksit vlerësohen me një shkallë nga 1(dobët) në 7 (shumë mirë)