Avokati Spartak Ngjela ka ngritur dje alarmin, sa i takon korrupsionit dhe krimit të organizuar, duke deklaruar se SHBA duhet të veprojë menjëherë, pasi korrupsioni ka ngritur krye kundër reformës në drejtësi. Ngjela është shprehur se politika amerikane duhet të mbrojë reformat demokratike në Shqipëri. Sipas Ngjelës SPAK dhe listat e hapura duhen mbrojtur.
Avokati Spartak Ngjela ndër të tjera ka theksuar se shqiptarët kanë vetëm një shpresë dhe sipas tij ajo është Amerika. “Politika amerikane tani duhet t’i mbrojë hapur reformat demokratike në Shqipëri, sepse korrupsioni po punon kundër. Duhet mbrojtur hapur, edhe SPAK-u, edhe listat e hapura në sistemin zgjedhor; sepse edhe ky sistem i të votuarit duhet parë si pjesë e pandarë e SPAK-ut.
Por gjithashtu, ky duhet konsideruar edhe si ingredienti historik i aleancës amerikano – shqiptare. Shqiptarët sot kanë vetëm një shpresë: Amerikën dhe drejtimin me forcë të reformave antikorrupsion në Shqipëri prej politikës amerikane. Sepse, nga të gjithë ndërkombëtarët perëndimorë, forcë në shoqërinë shqiptare ka vetëm Amerika”, është shprehur me anë të një postimi në Facebook, Spartak Ngjela.
Shpresa tek amerikanët
Spartak Ngjela në statusin e tij në Facebook, ka deklaruar se forca politike amerikane kundër korrupsionit duhet të veprojë, pasi sipas tij është e vetmja shpresë për shqiptarët. Ai thekson se ka shumë individë të korrupsionit të lartë shtetëror dhe të medias që kanë orientim nga Moska, Beogradi dhe nga Athina.
“E vetmja shpresë e shqiptarëve është forca e politikës amerikane kundër korrupsionit të lartë shtetëror. Pas eliminimit të këtij korrupsioni, gjithçka do të ecë drejt ngjitjes së nivelit të lartë intelektual shqiptar në drejtimin e Shqipërisë. Do të vijojë zhvillimi integral i saj, dhe politika e lartë amerikane do ta kuptojë realisht çdo të thotë për të aleanca e saj e ngushtë me shqiptarët në Ballkanin Perëndimor.
Prandaj nuk duhet të ketë asnjë stepje apo tërheqje, apo zbutje të qëndrimit amerikan, sepse janë të shumtë individët e korrupsionit të lartë shtetëror dhe të medias shqiptare që kanë sot orientim nga Moska, Beogradi apo nga Athina, kundër reformës që ka nisur”, ka deklaruar avokati Ngjela.
Sipas avokatit trysnia vjen nga Moska dhe Beogradi. Ai shprehet se serbët kanë mbi 200 vite që luajnë kundër Shqipërisë. “E gjithë kjo trysni, që më së shumti vjen nga Moska dhe nga Beogradi, është një metodë e vjetër që punon me përkrahësit e brendshëm në Shqipëri, të cilët kërkojnë t’i japin shoqërisë shqiptare karakter oriental, duke u nisur nga feja islame.
Serbët kanë dyqind vjet që po e luajnë këtë kartë të gënjeshtërt, në një kohë që dihet si fakt historik se vetë serbët kanë qenë aleatë të paskrupullt të osmanëve dhe armiq të egër kundër katolikëve shqiptarë. Dhe sot po duan të tregohen mbrojtës të Perëndimit dhe të krishterimit, kundër nesh. Është ligësi shekullore serbe, që amerikanët tani e njohin mirë dhe qeshin me ta”, është shprehur avokati.
Por Ngjela deklaron ndër të tjera, se sado që serbët përpiqen të destabilizojnë vendin, Shqipëria nuk dorëzohet lehtë. Sipas tij sekreti është se ata janë të lidhur me heroin e tyre kombëtar. “Por serbët, le t’i bien këmbës. Shqipëria dhe shqiptarët janë të lidhur me heroin kombëtar panshqiptar Gjergj Kastriot Skënderbeun. Ky është sekreti i shpirtit të lartë shqiptar që e lidh atë me qytetërimin perëndimor, më shumë nga të gjithë fqinjët e tij armiqësorë dhe pushtues territoresh shqiptare”, tha ai.