Sot biznesi në Tiranë, por dhe në disa rrethe kryesore të vendit ka ulur qepenat për një orë.
Mbyllja provizore e dyqaneve ka ardhur në shenjë proteste nga ana e bizneseve të vogla për të gjitha taksat e rritura në Shqipëri.
Biznesi është në të drejtën e vet që të protestojë, madje dhe të bojkotojë zhvillimin e aktivitetit për një kohë të pacaktuar, vetëm e vetëm që të detyrojë qeverinë që të plotësojë kërkesat e tyre.
Por ditën e sotme u vu re një fenomen i pandodhur në Shqipëri ndonjëherë.
Teksa opozita deklaroi një ditë më parë se do të jetë në mbështetje të protestës së biznesve, askush nuk e mendonte zhvillimin e papritur të ngjarjeve që rrodhën sot.
Bizneset e vogla nuk kanë pranuar përzierjen e politikës, pra opozitës, në protestën e tyre njëorëshe.
Madje kanë kërkuar që të largohen njëherë e mirë, duke mos kursyer as fyerjet dhe përdorimin e forcës fizike për të larguar deputetët e opozitës nga territori ku ata ushtrojnë aktivitetin e tyre të biznesit.
Janë dëgjuar përmes vidiove fyerje dhe sharje në drejtim të krerëve të opozitës, duke filluar nga Lulzim Basha, Monika Kryemadhi e deri tek deputeti më i thjeshtë.
Ndërsa është përdorur dhe forca fizike për të nxjerrë deputetët e LSI nga vendi ku ushtrojnë biznesin e tyre.
Dhe ushtrimi i forcës ka ndodhur vetëm e vetëm se deputeti minoren i LSI Indrit Braimllari dhe deputeti pa mend i PD Aldo Bumçi kanë kërkuar llogari ndaj disa biznesve se përse nuk kanë ulur qepenat dhe ata në protestën njëorëshe.
Fyerje dhe sharje, si dhe akuza se janë bërë milionerë me paratë e shqiptarëve kanë shoqëruar debatin e qytetarëve që ushtrojnë aktivitetin e biznesit të vogël në drejtim të përfaqësuesve të opozitës.
Madje i kanë pyetur më se njëherë se ku kanë qënë kur janë rritur taksat nga qeveria, herë në qeverisje dhe herë në opozitë por që nuk e kanë hapur gojën.
“Jeni si ata të qeverisë, ndaj nuk keni asnjë punë këtu”, ka qënë refreni që ka shoqëruar takimet e deputetëve dhe përfaqësuesve të opozitës me qytetarët.
Qeveria aktuale, ashtu sikurse qeverisjet e kaluara nuk është treguar e ndershme në sjelljen e saj ndaj bizneseve dhe qytetarëve. Madje i ka rënduar së tepërmi. Por qytetarët shqiptarë e kanë gati ndëshkimin për çdo qeverisje, e bën me votë dhe e largon nga pushteti.
E rëndë është situata kur populli përzë opozitën, nuk e qas fare në derë, kjo është e papërballueshme.
Pasi është goditur shpresa se një qeverisje tjetër do të bëjë më mirë në të ardhmen.
Fakti që qytetarët kanë përzënë sot opozitën, në të gjitha vendet ku ka shkuar në mbështetje të protestës së bizneseve, tregon se situata është shumë shumë e rëndë.
Dy rrugë kanë mbetur: ose të rithemelohet nga e para opozita shqiptare, ose të të vazhdojmë pa fund nën kthetrat e kësaj qeverie që është bërë për t’u larguar me kohë./Pamfleti.com