Gazetari i njohur dhe pronari i televizionit “Zjarr tv”, Ismet Drishti është sulmuar me leva mbrëmjen e djeshme nga persona të maskuar. Kanë qenë rreth 15 persona që kanë sulmuar fillimisht televizionin e tij dhe më pas vetë atë.
Ndërkohë policia me anë të një njoftimi për shtyp, pretendonte se është sulmuar me sende të forta nga një i mitur.
“Më datë 05.04.2018, u referuan materialet në Prokurorinë pranë Gjykatës së Shkallës Parë Tiranë, për shtetasin e mitur D.M, pasi në rrugën “3 Dëshmorët”, ka goditur me sende të forta shtetasin I.D, vjeç 52, banues në Tiranë. Punohet për kapjen e D.M. Neni 90 i Kodit Penal”, – thuhet në njoftimin e policisë.
Ngjarja u denoncua edhe nga deputeteja demokrate Albana Vokshi e cila shkruante, “Partia Demokratike e dënon me forcë sulmin dhe kërkon hetim të plotë e të shpejtë për ngjarjen e përsëritur kundër gazetarit Ismet Drishti, i njohur për qëndrimet kritike ndaj qeverisë.
Partia Demokratike ka nisur procesin e konsultimeve me shoqatat e gazetarëve dhe organizatat ndërkombëtare për hartimin e një rezolute parlamentare në mbrojtje të jetës dhe profesionit të gazetarëve ne Shqipëri.”